Rom 5 | NdeIBE | STEP | Ngakho-ke, njengoba silungisiwe ngokukholwa, silokuthula kuNkulunkulu ngeNkosi yethu uJesu Khristu,

Romans 5

Ukuthula Lentokozo

1 Ngakho-ke, njengoba silungisiwe ngokukholwa, silokuthula kuNkulunkulu ngeNkosi yethu uJesu Khristu, 2 esithole ngaye ukufinyelela ngokukholwa kulo umusa esimi kuwo khathesi. Njalo siyathokoza ngethemba elenkazimulo kaNkulunkulu. 3 Akunjalo kuphela, kodwa siyathokoza njalo ezinhluphekweni zethu, ngoba siyakwazi ukuthi ukuhlupheka kudala ukuqinisela; 4 ukuqinisela, ubuntu; lobuntu, ithemba. 5 Njalo ithemba kalisidanisi, ngoba uNkulunkulu usethululele uthando lwakhe ezinhliziyweni zethu ngoMoya oNgcwele, asinike yena.

6 Liyabona, ngesikhathi esifaneleyo, lapho sasisesebuthakathaka, uKhristu wafela abangakholwa kuNkulunkulu.

7 Akuvamanga ukuthi umuntu afele umuntu olungileyo, lanxa kungaba lolesibindi sokufela umuntu olungileyo. 8 Kodwa uNkulunkulu ubonakalisa uthando lwakhe kithi ngalokhu: Siseseyizoni, uKhristu wasifela.

9 Njengoba khathesi sesilungiswe ligazi lakhe, pho sizasindiswa kakhulu kangakanani elakeni lukaNkulunkulu ngaye! 10 Ngoba uma lapho sasiyizitha zikaNkulunkulu sabuyiselwa kuye ngokufa kweNdodana yakhe, kuzakuba kukhulu kangakanani, sesibuyiselwe, ukuhlengwa kwethu ngokuphila kwakhe!

11 Lokhu akunjalo nje kuphela, kodwa siyathokoza njalo kuNkulunkulu ngeNkosi yethu uJesu Khristu, khathesi esesithole ngaye ukubuyisana.

Ukufa Ngo-Adamu, Ukuphila NgoKhristu

12 Ngakho-ke njengalokhu isono sangena emhlabeni ngomuntu oyedwa, lokufa ngesono, njalo ngale indlela ukufa kwafika ebantwini bonke, ngoba bonke benze isono – 13 ngoba umthetho ungakabi khona, isono sasikhona emhlabeni. Kodwa isono kasibalwa nxa umthetho ungekho. 14 Lanxa kunjalo, ukufa kwabusa kusukela ngesikhathi sika-Adamu kusiya esikhathini sikaMosi, kanye lakulabo abangazange benze isono ngokweqa umlayo, njengokwenziwa ngu-Adamu, owayeyisifanekiso salowo owayezakuza.

15 Kodwa isipho kasifani lesiphambeko. Ngoba uma abanengi bafa ngesiphambeko salowomuntu oyedwa, umusa kaNkulunkulu kanye lesipho eseza ngomusa walowomuntu oyedwa, uJesu Khristu, kwaphuphuma kakhulu okungakanani kwabanengi!

16 Njalo, isipho sikaNkulunkulu kasifani lalokho okudalwa yisono salowomuntu oyedwa. Ukwahlulela kwalandela isono esisodwa kwaletha ukulahlwa, kodwa isipho salandela iziphambeko ezinengi saletha ukulungiswa.

17 Ngoba uma ngesiphambeko salowomuntu oyedwa, ukufa kwabusa ngalowomuntu oyedwa, labo abamukela umusa omnengi kaNkulunkulu kanye lesipho sokulunga bazabusa kakhulu okungakanani ekuphileni ngalowomuntu oyedwa uJesu Khristu.

18 Ngakho-ke njengoba okwalandela isiphambeko esisodwa kwaba yikulahlwa kwabantu bonke, ngakho ngokunjalo okwalandela isenzo esisodwa sokulunga yikulungiswa okuletha ukuphila ebantwini bonke.

19 Ngoba njengoba ngokungalaleli kwalowomuntu oyedwa abanengi benziwa izoni, ngakho ngokunjalo ukulalela kwalowomuntu oyedwa abanengi bazakwenziwa abalungileyo.

20 Umthetho wabekwa ukuze isiphambeko sande. Kodwa lapho okwanda khona isono, umusa wanda kakhulukazi, 21 ukuze kuthi njengoba isono sabusa ekufeni, kuthi ngokunjalo umusa lawo ubuse ngokulunga ukuba ulethe ukuphila okungapheliyo ngoJesu Khristu iNkosi yethu.